ಅವೆಂಜರ್ಸ್ ಡೂಮ್ಸ್‌ಡೇ ಸವಾಲುಗಳು

ಮಾರ್ವೆಲ್ ಸಿನೆಮ್ಯಾಟಿಕ್ ಯೂನಿವರ್ಸ್‌ನ (MCU) ಅತ್ಯಂತ ಜನಪ್ರಿಯ ಸೂಪರ್‌ಹೀರೋ ಪಾತ್ರಗಳನ್ನು ಅಭಿಮಾನಿಗಳ ಭಾವನೆಗಳಿಗೆ ಧಕ್ಕೆಯಾಗದಂತೆ ಹೊಸ ದಿಕ್ಕಿನಲ್ಲಿ ರೂಪಿಸುವುದು ಮತ್ತು ಕಥೆಯನ್ನು ಮುಂದಕ್ಕೆ ಕೊಂಡೊಯ್ಯುವುದು ಒಂದು ದೊಡ್ಡ ಸವಾಲಿನ ಕೆಲಸ ಎಂದು ಬಹುನಿರೀಕ್ಷಿತ ‘ಅವೆಂಜರ್ಸ್: ಡೂಮ್ಸ್‌ಡೇ’ ಚಿತ್ರದ ಸಹ-ನಿರ್ದೇಶಕ ಆಂಥೋನಿ ರುಸ್ಸೋ ಅಭಿಪ್ರಾಯಪಟ್ಟಿದ್ದಾರೆ. ಸಿನಿರಸಿಕರನ್ನು ಹೊಸತನದ ಮೂಲಕ ಬೆರಗುಗೊಳಿಸಲು ಸಿನಿಮಾ ಸೃಷ್ಟಿಕರ್ತರು ಮೊದಲು ತಮ್ಮನ್ನು ತಾವು ಅಚ್ಚರಿಗೊಳಿಸಿಕೊಳ್ಳಬೇಕಾದ ಅನಿವಾರ್ಯತೆ ಇರುತ್ತದೆ ಎಂದು ಅವರು ಹೇಳಿದ್ದಾರೆ.

‘ಅವೆಂಜರ್ಸ್: ಎಂಡ್‌ಗೇಮ್ ಎನ್‌ಕೋರ್’ ಪ್ರದರ್ಶನದ ನಂತರ ನಡೆದ ಪ್ರಶ್ನೋತ್ತರ ಸಂವಾದದಲ್ಲಿ ಮಾತನಾಡಿದ ಆಂಥೋನಿ ರುಸ್ಸೋ, ಅಭಿಮಾನಿಗಳಂತೆ ತಾವೂ ಈ ಪಾತ್ರಗಳನ್ನು ಅಪಾರವಾಗಿ ಪ್ರೀತಿಸುವುದಾಗಿ ತಿಳಿಸಿದರು. ಆದರೆ ಅಭಿಮಾನಿಗಳ ಅಭಿರುಚಿಗಳು ವೈವಿಧ್ಯಮಯವಾಗಿದ್ದು, ಪ್ರತಿಯೊಬ್ಬರೂ ಒಂದೇ ರೀತಿಯ ನಿರೀಕ್ಷೆ ಹೊಂದಿರುವುದಿಲ್ಲ. ಹಿಂದಿನ ಕಥಾಹಂದರವನ್ನು ಗೌರವಿಸುವುದರ ಜೊತೆಗೆ, ಪಾತ್ರಗಳು ಮುಂದೇನು ಮಾಡಲಿವೆ ಎಂಬುದರ ಸುತ್ತ ರೋಚಕತೆ ಮೂಡಿಸುವುದು ಅನಿವಾರ್ಯ ಎಂದರು. ಇದಕ್ಕೆ ಪೂರಕವಾಗಿ ಈ ಹಿಂದಿನ ಚಿತ್ರದಲ್ಲಿ ಕೊಂಚ ಹಾಸ್ಯಮಯವಾಗಿ ಕಂಡಿದ್ದ ಥೋರ್ (ಕ್ರಿಸ್ ಹೆಮ್ಸ್‌ವರ್ತ್) ಪಾತ್ರವನ್ನು ಈ ಹೊಸ ಚಿತ್ರದಲ್ಲಿ ಅತ್ಯಂತ ಗಂಭೀರ ಹಾಗೂ ಪ್ರಬಲ ರೂಪದಲ್ಲಿ ತೋರಿಸಲಾಗುತ್ತಿದೆ ಎಂದು ಸ್ಪಷ್ಟಪಡಿಸಿದರು.

ಇದೇ ವೇಳೆ ಚಿತ್ರದ ಅಂತಿಮ ತಾರಾಗಣದ ಕುರಿತು ಮಾತನಾಡಿದ ನಿರ್ದೇಶಕರು, ಚಿತ್ರದಲ್ಲಿ ಅಸಂಖ್ಯಾತ ಪಾತ್ರಗಳಿದ್ದು, ಕೆಲವರ ಹೆಸರನ್ನು ಮಾತ್ರ ಇದುವರೆಗೆ ಪ್ರಕಟಿಸಲಾಗಿದೆ ಮತ್ತು ಉಳಿದ ತಾರಾಗಣವನ್ನು ಶೀಘ್ರದಲ್ಲೇ ಪರಿಚಯಿಸಲಾಗುವುದು ಎಂದರು. ಸದ್ಯಕ್ಕೆ ಕ್ರಿಸ್ ಹೆಮ್ಸ್‌ವರ್ತ್ ಜೊತೆಗೆ ರಾಬರ್ಟ್ ಡೌನಿ ಜೂನಿಯರ್ (ಡಾಕ್ಟರ್ ಡೂಮ್ ಖಳನಾಯಕನಾಗಿ), ಕ್ರಿಸ್ ಇವಾನ್ಸ್, ಪಾಲ್ ರಡ್ ಹಾಗೂ ಟಾಮ್ ಹಿಡ್ಲ್‌ಸ್ಟನ್ ಸೇರಿದಂತೆ ಘಟಾನುಘಟಿ ತಾರಾಬಳಗ ಖಚಿತಗೊಂಡಿದೆ. ವಿಶ್ವದಾದ್ಯಂತ ಕುತೂಹಲ ಕೆರಳಿಸಿರುವ ‘ಅವೆಂಜರ್ಸ್: ಡೂಮ್ಸ್‌ಡೇ’ ಚಿತ್ರವು ಡಿಸೆಂಬರ್ 18 ರಂದು ಅದ್ಧೂರಿಯಾಗಿ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದೆ.

Please follow and like us: