ಹಿಮಾಲಯದ ಎಂಜಿನಿಯರಿಂಗ್ ಅದ್ಭುತ ಅಟಲ್ ಸುರಂಗ

ಕೆಲವು ಪ್ರಯಾಣಗಳಲ್ಲಿ ಗಮ್ಯಸ್ಥಾನವೇ ಸುಂದರವಾಗಿರುತ್ತದೆ. ಆದರೆ ಕೆಲವು ಪ್ರಯಾಣಗಳಲ್ಲಿ ದಾರಿಯೇ ಒಂದು ಅದ್ಭುತ ಅನುಭವವಾಗಿ ಮಾರ್ಪಡುತ್ತದೆ. ಅಟಲ್ ಸುರಂಗಕ್ಕೆ ನನ್ನ ಇತ್ತೀಚಿನ ಭೇಟಿ ಅಂತಹದ್ದೇ ಒಂದು ಪಯಣವಾಗಿತ್ತು ಪ್ರಕೃತಿಯ ಸೌಂದರ್ಯ, ಮಾನವನ ದೃಢಸಂಕಲ್ಪ ಮತ್ತು ಎಂಜಿನಿಯರಿಂಗ್‌ನ ಅದ್ಭುತ ಸಾಮರ್ಥ್ಯ ಒಂದೆಡೆ ಸೇರಿಕೊಂಡ ಅನುಭವ.

ಹಿಮಾಲಯದ ಪ್ರಬಲ ಪೀರ್ ಪಂಜಾಲ್ ಪರ್ವತಶ್ರೇಣಿಯ ಕೆಳಭಾಗದಲ್ಲಿ ನಿರ್ಮಾಣಗೊಂಡಿರುವ ಅಟಲ್ ಸುರಂಗವು ಕೇವಲ ಒಂದು ಪರ್ವತದೊಳಗೆ ಹಾದುಹೋಗುವ ಮಾರ್ಗವಲ್ಲ; ಇಂತಹ ಕಠಿಣ ಭೌಗೋಳಿಕ ಪ್ರದೇಶದಲ್ಲಿ ಸಂಪರ್ಕ ವ್ಯವಸ್ಥೆಯನ್ನೇ ಬದಲಿಸಿದ ಒಂದು ಮಹತ್ವದ ಸಾಧನೆಯಾಗಿದೆ. 9.02 ಕಿಲೋಮೀಟರ್ ಉದ್ದದ ಈ ಸುರಂಗವು ಸಮುದ್ರಮಟ್ಟದಿಂದ 10,000 ಅಡಿಗಿಂತ ಹೆಚ್ಚಿನ ಎತ್ತರದಲ್ಲಿ ನಿರ್ಮಿಸಲಾದ ವಿಶ್ವದ ಅತಿ ಉದ್ದದ ಹೆದ್ದಾರಿ ಸುರಂಗವೆಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ.

ಈ ಸುರಂಗ ನಿರ್ಮಾಣಕ್ಕೂ ಮೊದಲು, ಚಳಿಗಾಲದಲ್ಲಿ ಭಾರೀ ಹಿಮಪಾತದಿಂದಾಗಿ ರೋಹ್ಟಾಂಗ್ ಪಾಸ್ ಮಾರ್ಗವು ಹಲವಾರು ತಿಂಗಳುಗಳ ಕಾಲ ಮುಚ್ಚಿರುತ್ತಿತ್ತು. ಇದರಿಂದ ಲಾಹೌಲ್ ಸ್ಪಿತಿ ಪ್ರದೇಶವು ದೇಶದ ಇತರ ಭಾಗಗಳಿಂದ ಸಂಪರ್ಕ ಕಳೆದುಕೊಳ್ಳುವ ಪರಿಸ್ಥಿತಿ ಉಂಟಾಗುತ್ತಿತ್ತು. ಅಟಲ್ ಸುರಂಗವು ಈ ಪರಿಸ್ಥಿತಿಯನ್ನು ಬಹಳ ಮಟ್ಟಿಗೆ ಬದಲಿಸಿದೆ. ಇದು ಮನಾಲಿ ಮತ್ತು ಲಾಹೌಲ್ ಸ್ಪಿತಿ ನಡುವೆ ಎಲ್ಲಾ ಋತುಗಳಲ್ಲಿಯೂ ಸಂಪರ್ಕ ಕಲ್ಪಿಸುವ ಪ್ರಮುಖ ಮಾರ್ಗವಾಗಿದೆ.

ಇದರ ನಿರ್ಮಾಣದಿಂದ ಮನಾಲಿ ಸರ್ಚು ಮಾರ್ಗದ ರಸ್ತೆ ದೂರವು ಸುಮಾರು 46 ಕಿಲೋಮೀಟರ್‌ಗಳಷ್ಟು ಕಡಿಮೆಯಾಗಿದ್ದು, ಪ್ರಯಾಣದ ಸ ಮಯವೂ ಸುಮಾರು ನಾಲ್ಕರಿಂದ ಐದು ಗಂಟೆಗಳಷ್ಟು ಉಳಿತಾಯವಾಗುತ್ತದೆ. ಪರ್ವತದೊಳಗಿನ ಎಂಜಿನಿಯರಿAಗ್ ಅದ್ಭುತ ಅಟಲ್ ಸುರಂಗದ ಬಗ್ಗೆ ತಿಳಿದುಕೊಳ್ಳುವಾಗ ನನಗೆ ಅತ್ಯಂತ ಕುತೂಹಲ ಮೂಡಿಸಿದ ವಿಷಯವೆಂದರೆ, ಹಿಮಾಲಯದ ಆಳದಲ್ಲಿ ಇಂತಹ ಬೃಹತ್ ಸುರಂಗವನ್ನು ಹೇಗೆ ನಿರ್ಮಿಸಲಾಯಿತು ಎಂಬುದು.

ಇಷ್ಟು ಎತ್ತರದ ಪ್ರದೇಶದಲ್ಲಿ ನಿರ್ಮಾಣ ಕಾರ್ಯ ನಡೆಸುವುದು ಎಂಜಿನಿಯರ್‌ಗಳಿಗೆ ಅತ್ಯಂತ ದೊಡ್ಡ ಸವಾಲಾಗಿತ್ತು. ಕಠಿಣ ಭೌಗೋಳಿಕ ಪರಿಸ್ಥಿತಿಗಳು, ಹಿಮಪಾತ ಮತ್ತು ತೀವ್ರ ಚಳಿಯ ನಡುವೆಯೂ ನಿರ್ಮಾಣ ಕಾರ್ಯ ಮುಂದುವರಿಸಬೇಕಾಗಿತ್ತು. ಚಳಿಗಾಲದಲ್ಲಿ ಇಲ್ಲಿನ ತಾಪಮಾನ ಸುಮಾರು –25ಲಿಅ ವರೆಗೆ ಇಳಿಯಬಹುದಾದ ಪರಿಸ್ಥಿತಿಯಲ್ಲಿಯೂ ಕೆಲಸ ಮಾಡುವುದು ಮಾನವನ ಸಹನೆ, ತಂತ್ರಜ್ಞಾನ ಮತ್ತು ದೃಢಸಂಕಲ್ಪಕ್ಕೆ ನಿಜವಾದ ಪರೀಕ್ಷೆಯಾಗಿತ್ತು.

ಸುರಂಗವು ಕುದುರೆಯ ಲಾಳದ ಆಕಾರವನ್ನು ಹೋಲುವ ವಿನ್ಯಾಸದಲ್ಲಿ, ದ್ವಿಪಥ ವಾಹನ ಸಂಚಾರಕ್ಕೆ ಅನುಕೂಲವಾಗುವಂತೆ ನಿರ್ಮಿಸಲಾಗಿದೆ. ಆಧುನಿಕ ಗಾಳಿ ಸಂಚಾರ ವ್ಯವಸ್ಥೆ, ಅಗ್ನಿ ಸುರಕ್ಷತಾ ವ್ಯವಸ್ಥೆ, ಸಂಪರ್ಕ ವ್ಯವಸ್ಥೆ, ಬೆಳಕು, ಅಅಖಿಗಿ ಮತ್ತು ಗಾಳಿಯ ಗುಣಮಟ್ಟವನ್ನು ಪರಿಶೀಲಿಸುವ ವ್ಯವಸ್ಥೆಗಳು ಪ್ರಯಾಣಿಕರ ಸುರಕ್ಷತೆಯನ್ನು ಖಚಿತಪಡಿಸುತ್ತವೆ. ಇದಲ್ಲದೆ, ತುರ್ತು ಪರಿಸ್ಥಿತಿಯಲ್ಲಿ ಬಳಸಬಹುದಾದ ತುರ್ತು ನಿರ್ಗಮನ ಮಾರ್ಗವೂ ಸುರಂಗದ ವಿನ್ಯಾಸದ ಭಾಗವಾಗಿದೆ. ಮತ್ತು ನಂತರ… ಆ ಮಾಯೆಯ ಕ್ಷಣ ಆದರೆ ಅಟಲ್ ಸುರಂಗದ ಬಗ್ಗೆ ಯಾವುದೇ ವಿವರಣೆಯೂ ಅದರ ಮೂಲಕ ಹೊರಬಂದ ನಂತರ ಕಾಣುವ ದೃಶ್ಯವನ್ನು ಹೇಳದೆ ಪೂರ್ಣವಾಗುವುದಿಲ್ಲ.

ಸುರಂಗದ ಕತ್ತಲಿನಿಂದ ಹೊರಬಂದ ತಕ್ಷಣ ಕಣ್ಣೆದುರಿಗೆ ತೆರೆದುಕೊಳ್ಳುವುದು ಲಾಹೌಲ್‌ನ ಅದ್ಭುತ ಪ್ರಕೃತಿ ಸೌಂದರ್ಯ. ಪರ್ವತಗಳು ಇನ್ನಷ್ಟು ಹತ್ತಿರ ಬಂದAತೆ ಭಾಸವಾಗುತ್ತವೆ. ಗಾಳಿಯಲ್ಲೇ ಒಂದು ವಿಭಿನ್ನ ಅನುಭವ. ಕೆಲವೇ ಕ್ಷಣಗಳಲ್ಲಿ ಇಡೀ ಭೂದೃಶ್ಯವೇ ಬದಲಾಗುತ್ತದೆ. ಹಿಮದಿಂದ ಆವೃತವಾದ ಶಿಖರಗಳು, ಕಂದುಬಣ್ಣದ ಕಲ್ಲುಬಂಡೆಗಳ ಪರ್ವತಗಳು, ಪರ್ವತಗಳ ನಡುವೆ ಅಂಕುಡೊAಕಾಗಿ ಸಾಗುವ ರಸ್ತೆಗಳು ಮತ್ತು ನಿರ್ಮಲವಾದ ನೀಲಾಕಾಶ ಇವೆಲ್ಲವೂ ಸೇರಿ ಕಣ್ಣಿಗೆ ಹಬ್ಬವಾಗುತ್ತವೆ. ಒಬ್ಬ ಪ್ರವಾಸಿಗನಿಗೆ ಆ ಕ್ಷಣ ನಿಜಕ್ಕೂ ಮಾಂತ್ರಿಕ ಅನುಭವ. ಒಂದು ಬೃಹತ್ ಪರ್ವತದ ಹೃದಯದೊಳಗೆ ಸಾಗುತ್ತಾ, ಕೆಲವೇ ಕ್ಷಣಗಳಲ್ಲಿ ಸಂಪೂರ್ಣ ವಿಭಿನ್ನವಾದ ಜಗತ್ತಿಗೆ ಹೊರಬಂದ ಅನುಭವ.

ಅಲ್ಲಿ ನಿಂತು ವಿಶಾಲವಾದ ಹಿಮಾಲಯದ ಭೂದೃಶ್ಯವನ್ನು ನೋಡುತ್ತಿರುವಾಗ, ಮಾನವನು ಸಾಧಿಸಿರುವ ಈ ಅದ್ಭುತದ ಪ್ರಮಾಣ ವನ್ನು ಅರಿಯದೆ ಇರಲು ಸಾಧ್ಯವಿಲ್ಲ. ಒಂದು ಕಡೆ ಪ್ರಕೃತಿಯ ಅಸೀಮ, ಅದ್ಭುತ ಸೌಂದರ್ಯ. ಮತ್ತೊಂದು ಕಡೆ, ವಿಶ್ವದ ಅತ್ಯಂತ ಸವಾಲಿನ ಪರ್ವತ ಪ್ರದೇಶಗಳಲ್ಲಿ ಒಂದರೊಳಗೆ ನಿರ್ಮಿಸಲಾದ 9.02 ಕಿಲೋಮೀಟರ್ ಉದ್ದದ ಮಾನವ ನಿರ್ಮಿತ ಮಾರ್ಗ. ಹೀಗಾಗಿ ಅಟಲ್ ಸುರಂಗವು ಕೇವಲ ಒಂದು ಸುರಂಗವಲ್ಲ. ಇದು ಲಾಹೌಲ್ ಸ್ಪಿತಿ ಜನರ ಪಾಲಿಗೆ ಒಂದು ಜೀವನಾಡಿ. ಇದು ಒಂದು ಪ್ರಮುಖ ಕಾರ್ಯತಂತ್ರದ ಸಂಪರ್ಕ ಮಾರ್ಗ. ಪ್ರವಾಸೋದ್ಯಮ ಮತ್ತು ಸ್ಥಳೀಯ ಜೀವನೋಪಾಯಕ್ಕೆ ಹೊಸ ಅವಕಾಶಗಳನ್ನು ನೀಡಿದ ಸೇತುವೆ. ಎಲ್ಲಕ್ಕಿಂತ ಮುಖ್ಯವಾಗಿ, ಇದು ಮಾನವನ ದೃಢಸಂಕಲ್ಪ ಮತ್ತು ಸಾಧನೆಯ ಅದ್ಭುತ ಕಥೆ.

ಅಟಲ್ ಸುರಂಗದ ಮೂಲಕ ನಡೆದ ನನ್ನ ಪಯಣ ನನಗೆ ಒಂದು ಆಲೋಚನೆಯನ್ನು ನೀಡಿತು: “ಕೆಲವೊಮ್ಮೆ ಮಾನವನ ಶ್ರೇಷ್ಠ ಎಂಜಿನಿಯರಿAಗ್ ಸಾಧನೆಗಳು ಪ್ರಕೃತಿಯನ್ನು ಗೆಲ್ಲುವುದರಲ್ಲಿ ಇರುವುದಿಲ್ಲ; ಅದರ ಸೌಂದರ್ಯಕ್ಕೆ ಧಕ್ಕೆ ತರದೆ, ಅದರ ಹೃದಯದ ಮೂಲಕ ಸಾಗುವ ದಾರಿಯನ್ನು ಕಂಡುಕೊಳ್ಳುವುದರಲ್ಲಿರುತ್ತವೆ.”

ಸಂಪದಾ ಹನುಮಂತಪ್ಪ