ದೇಶದ ಸಂಚಾರ ವ್ಯವಸ್ಥೆಯಲ್ಲಿ ಮಹತ್ವದ ಕ್ರಾಂತಿ: ಗಂಟೆಗಟ್ಟಲೆ ಪ್ರಯಾಣದ ಅವಧಿ ನಿಮಿಷಗಳಿಗೆ ಕಡಿತ

ಭಾರತದ ಮೂಲಸೌಕರ್ಯ ವಲಯವು ಹೊಸ ಮೈಲಿಗಲ್ಲು ತಲುಪುತ್ತಿದ್ದು, ದೇಶಾದ್ಯಂತ ನಿರ್ಮಾಣವಾಗುತ್ತಿರುವ ಆಧುನಿಕ ಸೇತುವೆಗಳು, ಸುರಂಗಗಳು, ಎಕ್ಸ್‌ಪ್ರೆಸ್‌ವೇಗಳು ಹಾಗೂ ಹೈ-ಸ್ಪೀಡ್ ರೈಲು ಸಂಪರ್ಕಗಳು ಪ್ರಯಾಣಿಕರ ಸಮಯವನ್ನು ಭಾರಿ ಪ್ರಮಾಣದಲ್ಲಿ ಉಳಿತಾಯ ಮಾಡುತ್ತಿವೆ. ಕೇವಲ ರಸ್ತೆಗಳ ವಿಸ್ತರಣೆಯಷ್ಟೇ ಅಲ್ಲದೆ, ಪ್ರಯಾಣಿಕರಿಗೆ ದೈನಂದಿನ ಸಂಚಾರದಲ್ಲಿ ಗಂಟೆಗಟ್ಟಲೆ ಸಮಯ ಉಳಿಸುವುದೇ ಪ್ರಮುಖ ಮಾನದಂಡವಾಗಿದ್ದು, ಈ ಮೂಲಕ ಭೌಗೋಳಿಕ ದೂರವು ಸಂಚಾರಕ್ಕೆ ಅಡೆತಡೆಯಾಗದಂತೆ ಪರಿವರ್ತಿಸಲಾಗುತ್ತಿದೆ.

ದೇಶದ ನದಿ ಹಾಗೂ ಸಮುದ್ರ ಅಡೆತಡೆಗಳನ್ನು ದಾಟಲು ನಿರ್ಮಿಸಲಾದ ಸೇತುವೆಗಳು ಸಂಚಾರದ ಅವಧಿಯನ್ನು ಆಮೂಲಾಗ್ರವಾಗಿ ತಗ್ಗಿಸಿವೆ. ಅಸ್ಸಾಂ ಮತ್ತು ಅರುಣಾಚಲ ಪ್ರದೇಶವನ್ನು ಸಂಪರ್ಕಿಸುವ ಭೂಪೇನ್ ಹಜಾರಿಕಾ ಸೇತುವೆಯು 6 ಗಂಟೆಗಳ ಪ್ರಯಾಣವನ್ನು 1 ಗಂಟೆಗೆ ಇಳಿಸಿದ್ದರೆ, ಬ್ರಹ್ಮಪುತ್ರ ನದಿಯ ಬೋಗಿಬೀಲ್ ಸೇತುವೆಯು ಇಡೀ ದಿನದ ಪ್ರಯಾಣವನ್ನು ಕೇವಲ 1-2 ಗಂಟೆಗಳಿಗೆ ಸೀಮಿತಗೊಳಿಸಿದೆ. ಮುಂಬೈ ಮತ್ತು ನವಿ ಮುಂಬೈ ನಡುವಿನ ಅಟಲ್ ಸೇತು ಸಂಚಾರ ಅವಧಿಯನ್ನು 2 ಗಂಟೆಯಿಂದ 20 ನಿಮಿಷಕ್ಕೆ ಕಡಿತಗೊಳಿಸಿದೆ. ಬಿಹಾರದ ಕೋಸಿ ರೈಲ್ ಮಹಾಸೇತು 8 ಗಂಟೆಗಳ ರೈಲು ಪ್ರಯಾಣವನ್ನು 30 ನಿಮಿಷಕ್ಕೆ ಹಾಗೂ 300 ಕಿ.ಮೀ ದೂರವನ್ನು 22 ಕಿ.ಮೀ ಗೆ ಇಳಿಸಿದೆ. ಅರುಣಾಚಲ ಪ್ರದೇಶದ ಸಿಸ್ಸೇರಿ ನದಿ ಸೇತುವೆಯು ಪಾಸಿಘಾಟ್ ಮತ್ತು ರೋಯಿಂಗ್ ನಡುವೆ 5 ಗಂಟೆಗಳ ಸಮಯ ಉಳಿಸಿದೆ.

ಹಿಮಾಲಯದ ಕಡಿದಾದ ಪರ್ವತ ಶ್ರೇಣಿಗಳಲ್ಲಿ ನಿರ್ಮಿಸಲಾಗಿರುವ ಸುರಂಗಗಳು ಸುಗಮ ಸಂಪರ್ಕಕ್ಕೆ ದಾರಿಮಾಡಿಕೊಟ್ಟಿವೆ. ಹಿಮಾಚಲ ಪ್ರದೇಶದ 9.02 ಕಿ.ಮೀ ಉದ್ದದ ಅಟಲ್ ಸುರಂಗವು ಮನಾಲಿ-ಸರ್ಚು ನಡುವೆ 4-5 ಗಂಟೆ ಉಳಿತಾಯ ಮಾಡುವುದರ ಜೊತೆಗೆ ಲಾಹಾಲ್-ಸ್ಪಿತಿಗೆ ಸದಾಕಾಲದ ಸಂಪರ್ಕ ಕಲ್ಪಿಸಿದೆ. ಜಮ್ಮು-ಕಾಶ್ಮೀರದ ಡಾ. ಶ್ಯಾಮಾ ಪ್ರಸಾದ್ ಮುಖರ್ಜಿ ಸುರಂಗವು ಜಮ್ಮು-ಶ್ರೀನಗರ ಪ್ರಯಾಣದಲ್ಲಿ 2 ಗಂಟೆ, ಬನಿಹಾಲ್-ಖಾಜಿಗುಂಡ್ ಅವಳಿ ಸುರಂಗವು 1.5 ಗಂಟೆ ಉಳಿತಾಯ ಮಾಡುತ್ತಿವೆ. ಅರುಣಾಚಲ ಪ್ರದೇಶದ 13,000 ಅಡಿ ಎತ್ತರದ ಸೆಲಾ ಸುರಂಗವು ತೇಜ್‌ಪುರ-ತವಾಂಗ್ ಸಮರತಾಂತ್ರಿಕ ಮಾರ್ಗದಲ್ಲಿ ಸರ್ವಋತು ಸಂಚಾರ ಖಚಿತಪಡಿಸಿ 1 ಗಂಟೆಗೂ ಹೆಚ್ಚು ಪ್ರಯಾಣದ ಅವಧಿ ಕಡಿತಗೊಳಿಸಿದೆ.

ಎಕ್ಸ್‌ಪ್ರೆಸ್‌ವೇಗಳು ನಗರಗಳ ನಡುವಿನ ಸಂಚಾರದ ವೇಗವನ್ನು ಹೆಚ್ಚಿಸಿವೆ. ದೆಹಲಿ-ಮೀರತ್ ನಡುವೆ 2.5 ಗಂಟೆಗಳ ಪ್ರಯಾಣ 50 ನಿಮಿಷಕ್ಕೆ, ಬೆಂಗಳೂರು-ಮೈಸೂರು ನಡುವಿನ ಸಂಚಾರ 3 ಗಂಟೆಯಿಂದ 75 ನಿಮಿಷಕ್ಕೆ ಇಳಿಕೆಯಾಗಿದೆ. 213 ಕಿ.ಮೀ ಉದ್ದದ ದೆಹಲಿ-ಡೆಹ್ರಾಡೂನ್ ಕಾರಿಡಾರ್‌ನಿಂದ ಪ್ರಯಾಣ 6 ಗಂಟೆಯಿಂದ 2.5 ಗಂಟೆಗೆ, ಮುಂಬೈ-ನಾಗಪುರ ಸಮೃದ್ಧಿ ಮಹಾಮಾರ್ಗದಿಂದ 16 ಗಂಟೆಯಿಂದ 8 ಗಂಟೆಗೆ ತಗ್ಗಿದೆ. ಅಹಮದಾಬಾದ್-ಧೋಲೇರಾ ಹಾಗೂ ದೆಹಲಿ-ಅಮೃತಸರ-ಕತ್ರಾ ಎಕ್ಸ್‌ಪ್ರೆಸ್‌ವೇಗಳು ಕೈಗಾರಿಕೆ ಮತ್ತು ಪ್ರವಾಸೋದ್ಯಮಕ್ಕೆ ವೇಗ ನೀಡುತ್ತಿದ್ದು, ಭವಿಷ್ಯದ ದೆಹಲಿ-ಮುಂಬೈ ಎಕ್ಸ್‌ಪ್ರೆಸ್‌ವೇಯು 33 ಗಂಟೆಗಳ ಪ್ರಯಾಣವನ್ನು 12 ಗಂಟೆಗೆ ಇಳಿಸುವ ಗುರಿ ಹೊಂದಿದೆ.

ರೈಲ್ವೆ ಕ್ಷೇತ್ರದಲ್ಲೂ ಕ್ರಾಂತಿಕಾರಿ ಬದಲಾವಣೆಗಳಾಗಿದ್ದು, 549 ರೈಲುಗಳ ವೇಗ ಹೆಚ್ಚಿಸಲಾಗಿದೆ. ದೇಶದ ಮೊದಲ ವಂದೇ ಭಾರತ್ ರೈಲು ನವದೆಹಲಿ-ವಾರಾಣಸಿ ನಡುವೆ ಹಿಂದಿನ ಸೇವೆಗಳಿಗಿಂತ ಶೇ. 40-50 ರಷ್ಟು ವೇಗ ಪಡೆದುಕೊಂಡಿದ್ದರೆ, ಕತ್ರಾ-ಶ್ರೀನಗರ, ಬನಾರಸ್-ಖಜುರಾಹೊ ಹಾಗೂ ಎರ್ನಾಕುಲಂ-ಬೆಂಗಳೂರು ಮಾರ್ಗಗಳಲ್ಲಿ 2 ರಿಂದ 3 ಗಂಟೆಗಳಷ್ಟು ಸಮಯ ಉಳಿತಾಯವಾಗುತ್ತಿದೆ. ಹೌರಾ-ಗುವಾಹಾಟಿ ಮಾರ್ಗದಲ್ಲಿ ಭಾರತದ ಮೊದಲ ವಂದೇ ಭಾರತ್ ಸ್ಲೀಪರ್ ರೈಲು 3 ಗಂಟೆ ಸಮಯ ಉಳಿಸುತ್ತಿದೆ.

ಇದಲ್ಲದೆ, ಮುಂಬೈ-ಅಹಮದಾಬಾದ್ ನಡುವೆ 508 ಕಿ.ಮೀ ಉದ್ದದ ಭಾರತದ ಮೊದಲ ಬುಲೆಟ್ ರೈಲು ಕಾರಿಡಾರ್‌ನಲ್ಲಿ 7 ಕಿ.ಮೀ ಸಮುದ್ರದಾಳದ ರೈಲು ಸುರಂಗ ನಿರ್ಮಾಣವಾಗುತ್ತಿದ್ದು, ರಸ್ತೆ ಮಾರ್ಗದ 8-9 ಗಂಟೆಗಳ ಪ್ರಯಾಣವು 1 ಗಂಟೆ 58 ನಿಮಿಷಕ್ಕೆ ಇಳಿಕೆಯಾಗಲಿದೆ. ಕೇಂದ್ರ ಬಜೆಟ್‌ನಲ್ಲಿ ಘೋಷಿಸಲಾದ ₹16 ಲಕ್ಷ ಕೋಟಿ ವೆಚ್ಚದ 7 ಹೈ-ಸ್ಪೀಡ್ ಕಾರಿಡಾರ್‌ಗಳು ಬೆಂಗಳೂರು-ಚೆನ್ನೈ ಪ್ರಯಾಣವನ್ನು ಕೇವಲ 1 ಗಂಟೆ 13 ನಿಮಿಷ ಹಾಗೂ ಬೆಂಗಳೂರು-ಹೈದರಾಬಾದ್ ಪ್ರಯಾಣವನ್ನು 2 ಗಂಟೆಗಳಿಗೆ ಇಳಿಸಲಿದ್ದು, ಇಡೀ ದೇಶದ ಸಾರಿಗೆ ಸಂಪರ್ಕಕ್ಕೆ ಹೊಸ ದಿಕ್ಕು ತೋರುತ್ತಿವೆ.

Please follow and like us: