ನವದೆಹಲಿ: ಸಾರ್ವಜನಿಕರ ಗ್ರಹಿಕೆ, ದೃಷ್ಟಿಕೋನವನ್ನು ರೂಪಿಸುವಲ್ಲಿ ಮತ್ತು ಜ್ಞಾನದ ಬೆಳಕನ್ನು ಪಸರಿಸುವಲ್ಲಿ ಮಾಧ್ಯಮ ಹಾಗೂ ಪತ್ರಿಕೋದ್ಯಮ ಅತ್ಯಂತ ಪ್ರಮುಖ ಪಾತ್ರ ವಹಿಸುತ್ತವೆ ಎಂದು ಕೇಂದ್ರ ಸಂಸ್ಕೃತಿ ಮತ್ತು ಪ್ರವಾಸೋದ್ಯಮ ಸಚಿವ ಗಜೇಂದ್ರ ಸಿಂಗ್ ಶೇಖಾವತ್ ಅಭಿಪ್ರಾಯಪಟ್ಟಿದ್ದಾರೆ. ಮುಂಬೈನಲ್ಲಿ ಆಯೋಜಿಸಲಾಗಿದ್ದ ‘ಫಿಕ್ಕಿ ಫ್ರೇಮ್ಸ್’ (FICCI FRAMES) ಸಮ್ಮೇಳನದ ಉದ್ಘಾಟನಾ ಸಮಾರಂಭದಲ್ಲಿ ಅವರು ಮಾತನಾಡಿದರು.
ಕೇವಲ ಮನರಂಜನೆಯಾಗಷ್ಟೇ ಉಳಿಯದೆ, ಒಂದು ಕಥೆಯು ಸಮಾಜವು ಪರಸ್ಪರ ಹೇಗೆ ಅರ್ಥಮಾಡಿಕೊಳ್ಳುತ್ತದೆ ಮತ್ತು ಯಾವುದೇ ವಿಷಯದ ಬಗ್ಗೆ ಜನ ಹೇಗೆ ಯೋಚಿಸುತ್ತಾರೆ ಎಂಬುದನ್ನು ಪ್ರಭಾವಿಸುವ ಶಕ್ತಿ ಹೊಂದಿದೆ ಎಂದು ಸಚಿವರು ಹೇಳಿದರು. ಕಳೆದ ಒಂದು ಶತಮಾನದಲ್ಲಿ ಆದ ಬದಲಾವಣೆಗಿಂತ ಹೆಚ್ಚಿನ ತಾಂತ್ರಿಕ ಹಾಗೂ ಸಾಮಾಜಿಕ ರೂಪಾಂತರ ಕಳೆದೊಂದು ದಶಕದಲ್ಲಿ ಸಂಭವಿಸಿದೆ. ಇಂದಿನ ಡಿಜಿಟಲ್ ಯುಗದಲ್ಲಿ ಕಂಟೆಂಟ್ ಕೊರತೆ ಇಲ್ಲ, ಆದರೆ ಅಪರಿಮಿತ ಮಾಹಿತಿಯ ನಡುವೆ ಅರ್ಥಪೂರ್ಣತೆ, ನೈಜತೆ, ಮಾನವೀಯ ಸಂಬಂಧ ಮತ್ತು ಸಾರ್ವಜನಿಕರ ವಿಶ್ವಾಸವನ್ನು ಉಳಿಸಿಕೊಳ್ಳುವುದೇ ಮಾಧ್ಯಮ ಸಂಸ್ಥೆಗಳ ಮುಂದಿರುವ ಅತಿದೊಡ್ಡ ಸವಾಲಾಗಿದೆ ಎಂದು ಅವರು ವಿಶ್ಲೇಷಿಸಿದರು.
ಕಾರ್ಯಕ್ರಮದಲ್ಲಿ ಮಾತನಾಡಿದ ನಟ ಹಾಗೂ ಫಿಕ್ಕಿ ಫ್ರೇಮ್ಸ್ ರಾಯಭಾರಿ ಆಯುಷ್ಮಾನ್ ಖುರಾನಾ, ಭಾರತೀಯ ಮಾಧ್ಯಮ ಮತ್ತು ಮನರಂಜನಾ ಕ್ಷೇತ್ರವು ಕೇವಲ ಚಲನಚಿತ್ರಗಳಿಗೆ ಸೀಮಿತವಾಗದೆ ಗೇಮಿಂಗ್, ಕ್ರೀಡೆ, ಸರಣಿಗಳು ಹಾಗೂ ಡಿಜಿಟಲ್ ವೇದಿಕೆಗಳವರೆಗೆ ವಿಸ್ತರಿಸಿದ್ದು, ಇಲ್ಲಿ ಸೃಷ್ಟಿಯಾಗುವ ಮೌಲ್ಯವೇ ಮುಖ್ಯ ಎಂದರು. ಮಾಹಿತಿ ಮತ್ತು ಪ್ರಸಾರ ಸಚಿವಾಲಯದ ಹೆಚ್ಚುವರಿ ಕಾರ್ಯದರ್ಶಿ ಪ್ರಭಾತ್ ಮಾತನಾಡಿ, ಸುಳ್ಳು ಮಾಹಿತಿ, ಕೃತಕ (ಸಿಂಥೆಟಿಕ್) ಕಂಟೆಂಟ್ ಮತ್ತು ಎಐ ಸೃಷ್ಟಿತ ಮಾಹಿತಿಯ ಸವಾಲುಗಳನ್ನು ಉಲ್ಲೇಖಿಸಿ, ದೀರ್ಘಕಾಲಿಕ ಮೌಲ್ಯಯುತ ವಿಷಯ ಸೃಷ್ಟಿಯ ಅಗತ್ಯವನ್ನು ಒತ್ತಿ ಹೇಳಿದರು. ಎರಡು ದಿನಗಳ ಕಾಲ ನಡೆಯುವ ಈ ಸಮ್ಮೇಳನದಲ್ಲಿ ಚಲನಚಿತ್ರ, ಒಟಿಟಿ, ಎಐ, ಕೃತಿಸ್ವಾಮ್ಯ (ಕಾಪಿರೈಟ್) ಸೇರಿದಂತೆ ಮಾಧ್ಯಮ ರಂಗದ ಹಲವು ಮಹತ್ವದ ವಿಷಯಗಳ ಕುರಿತು ಗೋಷ್ಠಿಗಳು ಜರುಗಲಿವೆ.
More Stories
ಸಮಗ್ರ ಸಾರಿಗೆ ಪ್ರಾಧಿಕಾರ ಸ್ಥಾಪನೆ
ದೇಶದ ಸಂಚಾರ ವ್ಯವಸ್ಥೆಯಲ್ಲಿ ಮಹತ್ವದ ಕ್ರಾಂತಿ: ಗಂಟೆಗಟ್ಟಲೆ ಪ್ರಯಾಣದ ಅವಧಿ ನಿಮಿಷಗಳಿಗೆ ಕಡಿತ
ರೈತ ಪ್ರಾಣ ಕಾಪಾಡಿದರೆ, ನೇಕಾರ ಮಾನ ಕಾಪಾಡುತ್ತಾನೆ.