ಶಹಬಾಸ್ ಗುರುವೇ, ನಮೋ ನಮೋ ಎನುವೆ

https://youtu.be/NHc6OMSu0K4?si=SI_K4goOPEgwo6h2

ದೇವಕುಲಸಂಕೇತಗಳಾಗರದ ಹೊರಗು;

ಕಟ್ಟಿಕೊಂಡೇ ಇರುವ ಕಾರ್ಕೋಟಕದೊಳಗು.

ಪಟ್ಟೆ ಮುದ್ರೆಯ ನೊಸಲಬಿಸಿಲು;

ಕೊತ್ತಿನಡಿಗೆಯ ಗತ್ತು, ವ್ಯಾಘ್ರವರ್ಣ;

ಕಣ್ಣಕೊನೆಹನಿ ಬಿತ್ತು ನಕ್ರಾಕ್ಷಿಪಾತ;

ಪಾದಧೂಳಿಯ ಕೈಗೆ ದೀಕ್ಷಾದಂಡ ಶೋಭಿತ;

ಬಾಯಲ್ಲಿ ಜಿಟಿಪಿಟಿ ದೇವಜಪತಪ;

ಶಹಬಾಸ್ ಗುರುವೇ, ನಮೋ ನಮೋ ಎನುವೆ

 

ಕಾಯಕವೀರನ ಕಂಡಿಹಿರೇನು?

ತಪ್ಪದು ಜಪತಪ ತ್ರಿಕಾಲದಲ್ಲಿ;

ಮನವೇ ನಿಲ್ಲದು ಕಾಯಕದಲ್ಲಿ;

ಗುರಿ ಜಾರದ ಗುಂಜಾರವ ಜಾಗರ;

ಕಂಡವರಿಗೆ, ಉಂಡವರಿಗೆ ಸೋದರ!

ಬೆರಗೋ ಬೆರಗದು!

ಸಂಬಳ ಬರುವುದು ತಪ್ಪದೆ ತಿಂಗಳ ಕೊನೆಗೆ!

ಶಹಬಾಸ್ ಗುರುವೇ, ನಮೋ ನಮೋ ಎನುವೆ

 

ಯಾರು ತೀರಿದರೂ ಊರುಕೇರಿಯಲಿ;

ಮುಂದೆ ನಿಲ್ಲುವನು ಪಿಂಡಪಾರAಗತ;

ತಾವೇ ಕೊಡ, ಬೇರಾರಿಗೂ ಇವ;

ಮನವೇ ನಿಲ್ಲದು ಕಾಯಕದಲ್ಲಿ

ಬೆರಗೋ ಬೆರಗದು!

ಸಂಬಳ ಬರುವುದು ತಪ್ಪದೆ ತಿಂಗಳ ಕೊನೆಗೆ!

ಶಹಬಾಸ್ ಗುರುವೇ, ನಮೋ ನಮೋ ಎನುವೆ

 

ಥೇಟು ದೇವನಪರಾವತಾರ;

ಸೂಜಿಮೊನೆ ಸಿಕ್ಕರೂ ಬಿಡದೆ ನೆಕ್ಕುವನೀತ;

ಲಂಚ ಮುಟ್ಟುವುದಿಲ್ಲ; ಮಂಚ ಏರುವುದಿಲ್ಲ,

ಸಂಚಿನಲಿ ಬಲು ನಿಪುಣ, ಸುಳ್ಳಾಗ್ರೇಸರ;

ಕಣ್ಣು ಮಿಟುಕಿ, ಮಾತು ಕುಟುಕಿ

ಒಡೆದ ಮನೆಯ ಕಿಟಕಿ;

 

ಬೆರಗೋ ಬೆರಗದು!

ಸಂಬಳ ಬರುವುದು ತಪ್ಪದೆ ತಿಂಗಳ ಕೊನೆಗೆ!

ಶಹಬಾಸ್ ಗುರುವೇ, ನಮೋ ನಮೋ ಎನುವೆ

 

ಹೆಗಲ ಜೋಳಿಗೆ ತುಂಬ ದಾನದಕ್ಷಿಣೆ ತುಂಬಿ-

ತುಳುಕುವುದು ಭಾರ, ನಗೆಮೊಗದ ವೀರ;

ಮುಂಚೆನುವರೆಲ್ಲರನು ಹಿಂದಿಕ್ಕಿ ಹೊಸಕಿ;

ಕಾಲಕಸಗೊಳಿಸಿ ನಡೆವ ಭೂಪ;

ಅಹಹಾ ವೀರ, ಇವನೆ ಧೀರ;

ಎಲ್ಲ ಮನೆ ನಾಯಿಯೂ ಬೊಗಳುವುದು ತನ್ನ ಬೌಂಡರಿಯಲ್ಲಿ

ಬಾಲ ನಿಗುರಿ, ಮೇಲೆ ಎಗರಿ, ತೋರಿ ವೀರ ಪೌರುಷ;

ದಾಟಿದರೆ ಎಲ್ಲೆ, ಅದರಾಚೆ ಠುಸ್!

 

ಬುದ್ಧಿ ಬರುವುದೇ ಇವಗೆ? ಜನ್ಮಜಾತದ ದೋಷ;

ಬುದ್ಧ ಬೆಳಕನು ಹೊತ್ತು ಸುತ್ತುವಾತ;

ಹೋದಲ್ಲಿ, ಬಂದಲ್ಲಿ, ಒಂದೇ ಮಂತ;್ರ

ಎಲ್ಲವನು ಮುಗಿಸಿ ಸಿಕ್ಕಷ್ಟು ಮುಕ್ಕಿ;

ನುಂಗಿನೊಣೆಯುವ ತಂತ್ರ ಕುಲಿಶಕುಶಲಿ;

ಕೋತಿ ಕಜ್ಜಾಯ ನ್ಯಾಯ;

ಮಾತೋ, ಹಂಸಕ್ಷೀರನ್ಯಾಯ;

ಉಂಡಮನೆ ಜಂತಿ ಎಣಿಸುವ ಸಂತ;

ಕುಟ್ಟೆಹುಳು ಕಾಯಕದಿ ಸತತ ನಿರತ.

 

ಜಠರಾಗ್ನಿ ಜ್ವಾಲೆಯಲಿ ನೊಂದು ಬೆಂದವನಲ್ಲ;

ಕರುಣೆ, ಕಕ್ಕುಲಾತಿಗಳು ಗೊತ್ತೇ ಇಲ್ಲ;

ಈ ಈತ ಸ್ವಘೋಷಿತ ಸಂತ;

ರಾಮನವತಾರ ಮೋರೆ; ಒಳಗೆ ಕೃಷ್ಣನ ತೊರೆ;

ಆದರೂ ಕರೆವರೆಲ್ಲರು ಇವನ

ಮನೆಮನೆಯ ಭಿನ್ನಕ್ಕೆ, ಉಳಿದ ಮೃಷ್ಟಾನ್ನಕ್ಕೆ;

ಬಾಗುವರಿವಗೆ ಭಾಳ ಮಂದಿ;

ಶಹಬಾಸ್ ಗುರುವೇ, ನಮೋ ನಮೋ ಎನುವೆ.

 

– ಡಾ. ಬಿ.ಜಿ. ಕನಕೇಶಮೂರ್ತಿ, ವಿಶ್ರಾಂತ ಪ್ರಾಧ್ಯಾಪಕ