ಕುಶಲಕರ್ಮಿಗಳಿಗೆ ಮಾರುಕಟ್ಟೆ ವೇದಿಕೆ, ಶಿಲ್ಪ ಸಮಾಗಮ ಪ್ರದರ್ಶನ

ಆರ್ಥಿಕ ಸಬಲೀಕರಣಕ್ಕೆ ಬದ್ಧತೆ : ಸುಧಾಂಶು ಪಂತ್

ಪ್ರಮುಖ ಮುಖ್ಯಾಂಶಗಳು:

• ಮೈಸೂರಿನ ಅರಮನೆ ಮೈದಾನದಲ್ಲಿ ನಡೆಯುತ್ತಿರುವ ‘ಶಿಲ್ಪ ಸಮಾಗಮ ಪ್ರದರ್ಶನ 2026’

• ಕೇಂದ್ರ ಸಾಮಾಜಿಕ ನ್ಯಾಯ ಮತ್ತು ಸಬಲೀಕರಣ ಸಚಿವಾಲಯದ ಕಾರ್ಯದರ್ಶಿ ಸುಧಾಂಶು ಪಂತ್ ಭೇಟಿ

• ಅಕ್ಟೋಬರ್ 11 ರಿಂದ 19 ರವರೆಗೆ 9 ದಿನಗಳ ಕಾಲ ಆಯೋಜನೆ

• ಒಟ್ಟು 83 ಮಳಿಗೆಗಳ ಪೈಕಿ ಕುಶಲಕರ್ಮಿಗಳಿಗೆ 80 ಮಳಿಗೆಗಳ ಮೀಸಲು

• ಮಹಿಳಾ ಕುಶಲಕರ್ಮಿಗಳಿಗೆ ಮೀಸಲಾದ 37 ಪ್ರತ್ಯೇಕ ಮಳಿಗೆಗಳು

• ಕರ್ನಾಟಕ ಸೇರಿದಂತೆ 12 ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳ ಕಲಾವಿದರ ಭಾಗಿ

• ಎನ್.ಎಸ್.ಎಫ್.ಡಿ.ಸಿ., ಎನ್.ಬಿ.ಸಿ.ಎಫ್.ಡಿ.ಸಿ. ಹಾಗೂ ಎನ್.ಎಸ್.ಕೆ.ಎಫ್.ಡಿ.ಸಿ. ನಿಗಮಗಳ ಸಹಯೋಗ

  

• ಕುಶಲಕರ್ಮಿಗಳಿಗೆ ಉಚಿತ ಮಳಿಗೆ, ಪ್ರಯಾಣ ಭತ್ಯೆ ಹಾಗೂ ಸಾಗಣೆ ವೆಚ್ಚ ಭರಿಸಿದ ಸಚಿವಾಲಯ

• ಡಿಜಿಟಲ್ ಮಾರುಕಟ್ಟೆ ಕಲ್ಪಿಸುವ ‘ಭಾರತ್ ಟುಲಿಪ್’ ಉಪಕ್ರಮಕ್ಕೆ ವಿಶೇಷ ಉತ್ತೇಜನ

• 2022 ರಿಂದ ಇಲ್ಲಿಯವರೆಗೆ ನಡೆದ 13 ಪ್ರದರ್ಶನಗಳಿಂದ 975 ಕುಶಲಕರ್ಮಿಗಳಿಗೆ ಆರ್ಥಿಕ ನೆರವು

ಮೈಸೂರು: ಹಿಂದುಳಿದ ಸಮುದಾಯಗಳಿಗೆ ನೇರ ಮಾರುಕಟ್ಟೆ ಸಂಪರ್ಕ ಒದಗಿಸಿ, ಅವರಲ್ಲಿ ಉದ್ಯಮಶೀಲತೆ ಬೆಳೆಸುವ ಮೂಲಕ ಆರ್ಥಿಕ ಸಬಲೀಕರಣ ಸಾಧಿಸಲು ಕೇಂದ್ರ ಸರ್ಕಾರ ನಿರಂತರವಾಗಿ ಶ್ರಮಿಸುತ್ತಿದೆ ಎಂದು ಕೇಂದ್ರ ಸಾಮಾಜಿಕ ನ್ಯಾಯ ಮತ್ತು ಸಬಲೀಕರಣ ಸಚಿವಾಲಯದ ಕಾರ್ಯದರ್ಶಿ ಶ್ರೀ ಸುಧಾಂಶು ಪಂತ್ ತಿಳಿಸಿದರು.

ಮೈಸೂರಿನ ಅರಮನೆ ಮೈದಾನದಲ್ಲಿ ದಸರಾ ವಸ್ತುಪ್ರದರ್ಶನದ ಅಂಗವಾಗಿ ಸಚಿವಾಲಯ ಆಯೋಜಿಸಿರುವ ಒಂಬತ್ತು ದಿನಗಳ ‘ಶಿಲ್ಪ ಸಮಾಗಮ ಪ್ರದರ್ಶನ 2026’ಕ್ಕೆ ಭೇಟಿ ನೀಡಿ, ವಿವಿಧ ಮಳಿಗೆಗಳನ್ನು ಪರಿಶೀಲಿಸಿದ ನಂತರ ಅವರು ಮಾತನಾಡಿದರು. ಸಚಿವಾಲಯದ ಅಧೀನದಲ್ಲಿ ಕಾರ್ಯನಿರ್ವಹಿಸುವ ರಾಷ್ಟ್ರೀಯ ಪರಿಶಿಷ್ಟ ಜಾತಿಗಳ ಹಣಕಾಸು ಮತ್ತು ಅಭಿವೃದ್ಧಿ ನಿಗಮ (ಎನ್.ಎಸ್.ಎಫ್.ಡಿ.ಸಿ.), ರಾಷ್ಟ್ರೀಯ ಹಿಂದುಳಿದ ವರ್ಗಗಳ ಹಣಕಾಸು ಮತ್ತು ಅಭಿವೃದ್ಧಿ ನಿಗಮ (ಎನ್.ಬಿ.ಸಿ.ಎಫ್.ಡಿ.ಸಿ.) ಹಾಗೂ ರಾಷ್ಟ್ರೀಯ ಸಫಾಯಿ ಕರ್ಮಚಾರಿಗಳ ಹಣಕಾಸು ಮತ್ತು ಅಭಿವೃದ್ಧಿ ನಿಗಮಗಳ (ಎನ್.ಎಸ್.ಕೆ.ಎಫ್.ಡಿ.ಸಿ.) ಸಹಯೋಗದಲ್ಲಿ ಈ ಬೃಹತ್ ಪ್ರದರ್ಶನವನ್ನು ಆಯೋಜಿಸಲಾಗಿದೆ.

ಅಕ್ಟೋಬರ್ 11 ರಿಂದ ಆರಂಭವಾಗಿರುವ ಈ ಪ್ರದರ್ಶನದಲ್ಲಿ ಒಟ್ಟು 83 ಮಳಿಗೆಗಳಿದ್ದು, ಕುಶಲಕರ್ಮಿಗಳಿಗೆ 80 ಮಳಿಗೆಗಳನ್ನು ಮೀಸಲಿಡಲಾಗಿದೆ. ಇದರಲ್ಲಿ 37 ಮಳಿಗೆಗಳನ್ನು ಮಹಿಳಾ ಕುಶಲಕರ್ಮಿಗಳಿಗೆ ನೀಡಿರುವುದು ವಿಶೇಷ. ಕರ್ನಾಟಕ, ಆಂಧ್ರಪ್ರದೇಶ, ಬಿಹಾರ, ಕೇರಳ, ರಾಜಸ್ಥಾನ, ಪುದುಚೇರಿ, ಗುಜರಾತ್, ಮಧ್ಯಪ್ರದೇಶ, ಮಹಾರಾಷ್ಟ್ರ, ತೆಲಂಗಾಣ, ತಮಿಳುನಾಡು ಹಾಗೂ ಉತ್ತರ ಪ್ರದೇಶ ಸೇರಿದಂತೆ ಒಟ್ಟು 12 ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳ ಪರಿಶಿಷ್ಟ ಜಾತಿ, ಇತರೆ ಹಿಂದುಳಿದ ವರ್ಗಗಳು ಮತ್ತು ಸಫಾಯಿ ಕರ್ಮಚಾರಿ ಸಮುದಾಯಗಳ ಕುಶಲಕರ್ಮಿಗಳು ಪಾಲ್ಗೊಂಡಿದ್ದಾರೆ.

ಮಳಿಗೆಗಳಲ್ಲಿ ಕೈಮಗ್ಗ ಸೀರೆಗಳು, ಕರಕುಶಲ ವಸ್ತುಗಳು, ಸಾಂಬಾರ ಪದಾರ್ಥಗಳು, ಜೇನುತುಪ್ಪ ಉತ್ಪನ್ನಗಳು, ಮರದ ಆಟಿಕೆಗಳು, ಚರ್ಮದ ಪರಿಕರಗಳು, ಟೆರಾಕೋಟಾ ಮಣ್ಣಿನ ಪಾತ್ರೆಗಳು, ಕೃತಕ ಆಭರಣಗಳು ಹಾಗೂ ಬೀಟಿ ಮರದ ಕಲಾಕೃತಿಗಳು ಪ್ರದರ್ಶನ ಮತ್ತು ಮಾರಾಟಕ್ಕಿವೆ. ಕುಶಲಕರ್ಮಿಗಳಿಗೆ ಉಚಿತ ಮಳಿಗೆ, ಪ್ರಯಾಣ ಭತ್ಯೆ ಮತ್ತು ಸರಕು ಸಾಗಣೆ ನೆರವನ್ನು ಸಚಿವಾಲಯವೇ ಒದಗಿಸಿದೆ. ಜಾಗತಿಕ ಮಾರುಕಟ್ಟೆ ತಲುಪಲು ‘ಭಾರತ್ ಟುಲಿಪ್’ ಉಪಕ್ರಮದ ಮೂಲಕ ಆನ್‌ಲೈನ್ ವೇದಿಕೆಯನ್ನೂ ಕಲ್ಪಿಸಲಾಗುತ್ತಿದೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದರು. ಈ ಪ್ರದರ್ಶನವು ಅಕ್ಟೋಬರ್ 19 ರಂದು ಮುಕ್ತಾಯಗೊಳ್ಳಲಿದೆ.

Please follow and like us: