ಸೋಷಿಯಲ್ ಮೀಡಿಯಾ: ಕಣ್ಣಿಗೆ ಆಕರ್ಷಕ, ಮನಸ್ಸಿಗೆ ಮಾರಕ!

ಮಾಹಿತಿಯ ಜಂಕ್ ಫುಡ್ ವರ್ಸಸ್ ಜ್ಞಾನದ ಪೌಷ್ಟಿಕ ಆಹಾರ

ಸೋಷಿಯಲ್ ಮೀಡಿಯಾ ಅಂದ್ರೆ ಸಿಕ್ಕಸಿಕ್ಕದ್ದೆಲ್ಲ ತಿಂದು ಹೊಟ್ಟೆ ಕೆಡಿಸಿಕೊಂಡ್ರಂತೆ… ಪತ್ರಿಕೆ ಓದಿದರೆ ಪೌಷ್ಠಿಕ ಆಹಾರ ಮಾತ್ರ ಉಂಡಂತೆ!

ಇತ್ತೀಚೆಗೆ ಈ ಮಾತು ಇಂದಿನ ಡಿಜಿಟಲ್ ಜಗತ್ತಿನ ಕಹಿ ಸತ್ಯಕ್ಕೆ ಹಿಡಿದ ಕೈಗನ್ನಡಿಯಾಗಿದೆ. ತಂತ್ರಜ್ಞಾನ ಬೆಳೆದಂತೆ ನಮಗೆ ಮಾಹಿತಿ ಸಿಗುವ ಮೂಲಗಳು ಬದಲಾಗಿರಬಹುದು, ಆದರೆ ಆ ಮಾಹಿತಿಯ ಗುಣಮಟ್ಟ ಎಷ್ಟರಮಟ್ಟಿಗೆ ಕುಸಿದಿದೆ ಎಂಬುದನ್ನು ಅರ್ಥ ಮಾಡಿಕೊಳ್ಳಲು ಈ ಒಂದು ಸಾಲಿನ ಹೋಲಿಕೆ ಸಾಕು. ನಮ್ಮ ದೈಹಿಕ ಆರೋಗ್ಯ ನಾವು ತಿನ್ನುವ ಆಹಾರದ ಮೇಲೆ ನಿರ್ಧಾರವಾದರೆ, ನಮ್ಮ ಮಾನಸಿಕ ಆರೋಗ್ಯ ನಾವು ಸೇವಿಸುವ ಮಾಹಿತಿಯ ಮೇಲೆ ನಿರ್ಧಾರವಾಗುತ್ತದೆ.

ಇಂದಿನ ದಿನಗಳಲ್ಲಿ ಬೆಳಿಗ್ಗೆ ಕಣ್ಣು ಬಿಟ್ಟ ತಕ್ಷಣ ಬಹುತೇಕರು ಮೊದಲು ಕೈಗೆತ್ತಿಕೊಳ್ಳುವುದು ಮೊಬೈಲ್ ಫೋನ್‌ಗಳನ್ನು. ಫೇಸ್‌ಬುಕ್, ಇನ್‌ಸ್ಟಾಗ್ರಾಮ್, ಎಕ್ಸ್ (ಟ್ವಿಟರ್) ಹಾಗೂ ವಾಟ್ಸಾಪ್‌ಗಳ ಸಾಗರದಲ್ಲಿ ಮುಳುಗೇಳುತ್ತಾರೆ. ಇದು ಹಾದಿಬದಿಯ ಚಟಪಟ ಜಂಕ್ ಫುಡ್ ತಿಂದ ಹಾಗೆ. ನಾಲಿಗೆಗೆ ರುಚಿ, ನೋಡಲು ಆಕರ್ಷಕ, ಆದರೆ ಹೊಟ್ಟೆಗೆ ಮಾತ್ರ ಕೆಡುಕು!

ಮಾಹಿತಿಯ ಅಜೀರ್ಣ (Information Overload): ದಿನಕ್ಕೆ ಸಾವಿರಾರು ರೀಲ್ಸ್‌ಗಳು, ಸತ್ಯಾಸತ್ಯತೆ ಇಲ್ಲದ ಫಾರ್ವರ್ಡ್ ಮೆಸೇಜ್‌ಗಳು, ಗಾಸಿಪ್‌ಗಳು ನಮ್ಮ ಮೆದುಳನ್ನು ತುಂಬುತ್ತಿವೆ. ಯಾವುದು ಸತ್ಯ, ಯಾವುದು ಸುಳ್ಳು ಎಂದು ತಿಳಿಯದ ಪರಿಸ್ಥಿತಿ ನಿರ್ಮಾಣವಾಗಿದೆ.

ಮಾನಸಿಕ ಆರೋಗ್ಯದ ಏರುಪೇರು: ಅತಿಯಾದ ಸೋಶಿಯಲ್ ಮೀಡಿಯಾ ಬಳಕೆ ಮೆದುಳಿನ ಯೋಚನಾ ಶಕ್ತಿಯನ್ನು ಕುಂಠಿತಗೊಳಿಸುತ್ತದೆ. ಸಿಕ್ಕಸಿಕ್ಕದ್ದನ್ನೆಲ್ಲಾ ಓದಿ, ನೋಡಿ ಕೊನೆಗೆ ಸಿಗುವುದು ಮಾನಸಿಕ ಆಯಾಸ ಮತ್ತು ಗೊಂದಲ ಮಾತ್ರ. ಇದು ಖಂಡಿತವಾಗಿಯೂ ‘ಹೊಟ್ಟೆ ಕೆಡಿಸಿಕೊಂಡ’ ಸ್ಥಿತಿಯೇ ಸರಿ.

ಮುಂಜಾನೆ ಕಾಫಿ ಕಪ್ಪಿನೊಂದಿಗೆ ಕೈಯಲ್ಲಿ ಹಿಡಿಯುವ ದಿನಪತ್ರಿಕೆ ಒಂದು ಪೌಷ್ಠಿಕ ಭೋಜನವಿದ್ದಂತೆ. ಅಡುಗೆಮನೆಯಲ್ಲಿ ತರಕಾರಿಗಳನ್ನು ತೊಳೆದು, ಹದವಾಗಿ ಬೇಯಿಸಿ, ರುಚಿಯಾದ ಅಡುಗೆ ಮಾಡುವಂತೆ; ಪತ್ರಿಕೆಯೊಂದರಲ್ಲಿ ಪ್ರಕಟವಾಗುವ ಸುದ್ದಿಗಳು ಕರಡು ತಿದ್ದಿ, ಸತ್ಯಾಸತ್ಯತೆಯನ್ನು ಪರಿಶೀಲಿಸಿ, ಜವಾಬ್ದಾರಿಯುತವಾಗಿ ಸಿದ್ಧವಾಗಿರುತ್ತವೆ.

ಸಂಪೂರ್ಣ ಪೌಷ್ಟಿಕಾಂಶ:  ಒಂದು ಆದರ್ಶ ಪತ್ರಿಕೆಯಲ್ಲಿ ದೇಶ-ವಿದೇಶಗಳ ವಿದ್ಯಮಾನಗಳು, ಕ್ರೀಡೆ, ಕೃಷಿ, ಸೈನ್ಸ್-ಟೆಕ್ನಾಲಜಿ, ಸಂಪಾದಕೀಯ ಪುಟ ಹಾಗೂ ಸಾಹಿತ್ಯಿಕ ವಿಚಾರಗಳು ಸಮತೋಲನದಲ್ಲಿರುತ್ತವೆ. ಇದು ನಮ್ಮ ಜ್ಞಾನದ ಹಸಿವನ್ನು ನೀಗಿಸುತ್ತದೆ.

ವಿವೇಚನಾ ಶಕ್ತಿಯ ವಿಕಸನ: ಪತ್ರಿಕೆ ಓದುವುದರಿಂದ ಭಾಷಾ ಶುದ್ಧತೆ ಬೆಳೆಯುತ್ತದೆ, ಏಕಾಗ್ರತೆ ಹೆಚ್ಚುತ್ತದೆ ಮತ್ತು ವಿಷಯದ ಆಳ-ಅಗಲ ಅರ್ಥವಾಗುತ್ತದೆ. ಇದು ಮನಸ್ಸಿಗೆ ಅನಗತ್ಯ ಕಸವನ್ನು ತುಂಬದೇ, ಬುದ್ಧಿಗೆ ಅಗತ್ಯವಾದ ಪೌಷ್ಟಿಕಾಂಶವನ್ನು ಮಾತ್ರ ಒದಗಿಸುತ್ತದೆ.

 ಕೊನೆಯ ಮಾತು : ಆಹಾರದ ವಿಷಯದಲ್ಲಿ ನಾವು ಹೇಗೆ ಜಾಗರೂಕರಾಗಿರುತ್ತೇವೆಯೋ, ಹಾಗೆಯೇ ಮನಸ್ಸಿಗೆ ಕೊಡುವ ಮಾಹಿತಿಯ ವಿಷಯದಲ್ಲೂ ವಿವೇಚನೆ ಇರಬೇಕು. ಹೊಟ್ಟೆ ಕೆಡಿಸುವ ‘ಡಿಜಿಟಲ್ ಜಂಕ್ ಫುಡ್’ಗಳ ವ್ಯಾಮೋಹವನ್ನು ಕಡಿಮೆ ಮಾಡಿ, ಬುದ್ಧಿ ಮತ್ತು ಜ್ಞಾನವನ್ನು ಬೆಳೆಸುವ ‘ಪೌಷ್ಠಿಕ ಆಹಾರ’ದಂತಿರುವ ಪತ್ರಿಕೆಗಳನ್ನು ಓದುವ ಹವ್ಯಾಸವನ್ನು ಜೀವಂತವಾಗಿಡಬೇಕಿದೆ. ಮಾಹಿತಿಯ ಅತಿರೇಕದ ನಡುವೆ ನಮಗೆ ಬೇಕಾಗಿರುವುದು ಕೇವಲ ‘ಮನೋರಂಜನೆ’ಯಲ್ಲ, ಬದುಕನ್ನು ಕಟ್ಟಿಕೊಡುವ ‘ವೈಚಾರಿಕತೆ’. ಹಾಗಾಗಿ, ಸಿಕ್ಕಸಿಕ್ಕದ್ದನ್ನು ತಿನ್ನುವುದನ್ನು ಬಿಟ್ಟು, ಆರೋಗ್ಯಕರವಾದದ್ದನ್ನು ಆಸ್ವಾದಿಸೋಣ.